इन्द्रजात्राका लागि बसन्तपुर क्षेत्रमा तयारी गरिँदै

काठमाडौं- काठमाडौंको बसन्तपुर क्षेत्रमा इन्द्रजात्राको तयारी तीव्र गतिमा अगाडि बढेको छ। इन्द्रध्वजा फहराउने लिंगो भक्तपुरबाट बसन्तपुर पुर्‍याइसकिएको छ।

रथ तान्‍ने बाटोको खाल्डोहरू पुर्ने काम भइसकेको छ। केही ठाउँहरूमा भइरहेको छ। ८ दिनसम्म मनाइने जात्राका लागि गद्दी बैठक सजाउनेदेखि रथ निर्माणको काम तीव्र गतिमा भइरहेको छ।

प्रत्येक वर्ष भाद्र शुक्ल चतुर्दशीका दिन पर्ने यो पर्व काठमाडौं, ललितपुर, भक्तपुर, धुलिखेल, दोलखालगायतका स्थानमा मनाइन्छ।

भाद्र शुक्ल द्वादशीका दिन हनुमानढोका अगाडि धार्मिक विधिपूर्वक इन्द्रध्वजासहितको लिङ्गो ठड्याइएपछि प्रारम्भ हुने यो जात्रा विभिन्न प्रकारका नाचगान, रथयात्रा र देवीदेवताको पूजाआजा गरी आठ दिनसम्म मनाउने प्रचलन छ।