भारतसँग ‘एयर रुट’ मिलाउन प्रावधिक टोलीको बैठक गर्ने सहमति

काठमाडौं- परराष्ट्रमन्त्री आरजु राणा देउवाले संसद्को अन्तर्राष्ट्रिय तथा पर्यटन समितिको बैठकमा उठेका प्रश्नको जवाफ दिएकी छन्। सो क्रममा उनले आफ्नो भारत भ्रमण ‘गुडविल भिजिट’ भएको प्रस्ट पारिन्। भ्रमणको मुख्य उद्देश्य दुईपक्षीय संयन्त्रलाई कसरी क्रियाशील बनाउने भन्नेमा केन्द्रित रहेको उनले बताइन्।

भ्रमणको क्रममा एयर रुटको बारेमा कुरा राखेको र सो क्रममा टेक्निकल टिमको मिटिङ गर्ने सहमति भएको उनले बताइन्। पन्चेश्वरको बारेमा सहमति लगभग अन्तिम चरणमा रहेको उनको भनाइ थियो। भ्रमणको क्रममा इपीजीबारे कुनै कुरा नभएको उनले प्रस्ट पारिन्। यो विषयमा उपयुक्त समयमा छलफल हुने उनको भनाइ थियो।

बंगालादेशसँग व्यापारको कुरा पनि उठिरहेको उल्लेख गर्दै उनले २ दिन अघिमात्र त्यहाँका राजदूतसँग पनि छलफल भएको समितिमा जानकारी गराइन्।

राजदूत नियुक्ति समावेशी नभएको स्वीकार गर्दै उनले रिक्त रहेको एक स्थानमा मधेसबाट सहभागी गराउन प्रयासरत रहेको बताइन्। दलित तथा मुस्लिम समुदायबाट सिफारिस हुन नसकेकोमा उनले माफी समेत मागिन्। अर्को पटक यस्ता विषयमा ध्यान दिने उनको भनाइ थियो।

भारतमा शङ्कर शर्मालाई कार्यदक्षताको आधारमा राजदूत सिफारिस गरिएको समेत उनले बताइन्। राजदूत नियुक्ति निर्देशिका नै संशोधन गर्नुपर्ने देखिएको भन्दै उनले यसबारे समितिले पहल गर्न आवश्यक रहेको बताइन्।